Azərbaycan, Bakı, 27 yanvar /Trend, müxbir A.Axundov/
2012-ci ildə Bakının mənzil bazarında ötən ilin ikinci yarısında müşahidə edilən qiymət tendensiyası qorunacaq. Bu barədə cümə günü Trend-ə "MBA Group" konsaltinq şirkətinin baş direktoru Nüsrət İbrahimov bildirib.
"Birinci rübdə gözlənilən nisbi qiymət azalmasına baxmayaraq, sonrakı aylarda qiymətlərin sabitləşməsi və qismən artımı qaçılmazdır", - İbrahimov qeyd edib.
Onun sözlərinə görə, lakin qiymətlərin artımı və azalması davamlı olmayacaq, 2012-ci ildə bazarda mövsümi amillərlə bağlı qiymətlərin dəyişməsi dinamikası müşahidə ediləcək.
"Ümumilikdə, il ərzində qiymətlərin 5-6 faiz artması gözlənilir", - İbrahimov vurğulayıb.
Onun sözlərinə görə, köhnə tikililərdə mənzillərin qiymətlərində əsasən azalma, yeni tikililərdə isə bahalaşma gözlənilir.
"Bu onunla bağlıdır ki, ailənin gəlirinin artması ilə o, daha geniş şəraitdə yaşamaq istəyir. Köhnə binalar isə yalnız ipotekanın predmeti ola bilər", - İbrahimov bildirib.
Onun sözlərinə görə, mənzil kirayəsində qiymətlər birbaşa ölkədəki inflyasiya ilə bağlı olacaq və 6-7 faiz artacaq.