Azərbaycan, Bakı, 2 aprel /Trend, müxbir Ə.Həsənov/
Dövlət Şəhərsalma və Arxitektura Komitəsi həftə ərzində 2030-cu ilə qədər "Böyük Bakının regional inkişaf planı"nın hazırlanması çərçivəsində dördüncü beynəlxalq məsləhətçi ilə müqavilə imzalayacaq. Bu barədə bazar ertəsi Trend-ə baş planın hazırlanması üzrə layihənin koordinatoru Novruz Eldarov bildirib.
Layihə iqtisadi inkişaf məsələləri üzrə ABŞ-dan (Kaya Miller), şəhər planlaşdırılması üzrə İtaliyadan (Ancelo de Urso) məsləhətçilərlə və Bakı Dövlət Layihə İnstitutu ilə birgə hazırlanır. Ekologiya məsələləri üzrə dördüncü məsləhətçi İspaniyanın "Eptisa" şirkəti seçilib.
Onun sözlərinə görə, ekoloji məsləhətçi müqavilə çərçivəsində işlərin yerinə yetirilməsi üçün 18 aylıq müddət xahiş edib. Lakin işçi qrupu bununla razılaşa bilməz, çünki bu, "Böyük Bakının inkişaf planı"nın hazırlanma müddətinin 2013-cü ilin oktyabrınadək uzadılması mənasını verəcək.
"Eptisa" işlərin daha tez, yəni 2013-cü il aprelin 1-dək görülməsi ilə razılaşmır. Buna görə də onunla müqavilə təkliflər hesaba alınmaqla tərtib edilib və təsdiq edilməsi üçün Dünya Bankına göndərilib. Bank müqaviləni bəyənən kimi şirkət işlərin həyata keçirilməsinə başlayacaq. DB-nin razılığı alınacağı təqdirdə, "Böyük Bakının inkişaf planı"nın hazırlanma müddəti avtomatik olaraq 2013-cü il oktyabrın 1-dək uzadılacaq", - Eldarov deyib.
Onun sözlərinə görə, əsas vəzifə "Böyük Bakı"nın səmərəli şəhərsalma idarəetmə sisteminin, onun əsasında isə Azərbaycanın qalan şəhər və yaşayış məntəqələrinin yaradılmasıdır.
