Azərbaycan, Bakı, 2 may /Trend, müxbir Ə.Həsənov/
Bakıda keçirilən İqtisadi Əməkdaşlıq Təşkilatı (ECO) ölkələrinin ticarətin təşviqi üzrə təşkilatlarının rəhbərlərinin ikinci iclasının əsas müzakirə mövzuları bəzi tariflərin ləğv edilməsi və ECO ölkələri arasında ticarətin təşviqi üzrə tədbirlərin görülməsi məsələləridir. Trend-in məlumatına görə, bu barədə çərşənbə günü ECO-nun baş katibliyinin müavini Fatih Ünlü iclas zamanı bildirib.
"Təşkilatın iştirakçı ölkələri arasında ticarətin təşviqi üçün əlverişli şəraitin yaradılması üzrə artıq müəyyən razılıqlar əldə edilib" , - Ünlü deyib.
Onun sözlərinə görə, iclasda, həmçinin resursların səmərəli istifadə edilməsi, ticarət münasibətləri potensialının artırılması ilə bağlı proqramların reallaşdırılması üzrə ölkələrə dəstəyin göstərilməsi, özəl sektorla əməkdaşlığın genişləndirilməsi, onun fəaliyyətinin gücləndirilməsi, zəruri infrastrukturun yaradılması və regional koordinasiyanın gücləndirilməsi üçün şəraitin yaradılması məsələləri müzakirə ediləcək.
Əsas prioritetlərdən biri maliyyə vəsaitlərinin cəlb edilməsi, habelə müxtəlif istiqamətlər, xüsusən standartlaşdırma sahəsi üzrə potensialın yüksəldilməsi məsələləridir.
"Malların yüksək keyfiyyəti ticarəti təşviq edir, buna görə də gündəliyə, həmçinin brendinq, reklam, ticarətin maliyyələşdirilməsi, məlumatın səmərəli mübadiləsi, ticari və gömrük prosedurlarının sadələşdirilməsi, sərgilərin təşkil edilməsi, sahibkarlıq və ümumilikdə ticarət mədəniyyətinin keyfiyyətinin yüksəldilməsi ilə bağlı məsələlər daxil edilib", - Ünlü qeyd edib.
