Azərbaycan, Bakı, 30 iyun /Trend, müxbir Ə.Həsənov/
2012-ci ilin mayında Bakıda təkrar mənzil bazarında qiymətlər əvvəlki ayla müqayisədə 0,7 faiz artıb və bir kavdrat metr üçün 990 dollar təşkil edib. Trend-in məlumatına görə, bu barədə "Əmlak Bazarı İştirakçıları" İctimai Birliyinin məlumatında deyilir.
Mayda təkrar mənzil bazarında təklif 1,2 faiz artıb, 7600-ə yaxın mənzil satışa çıxarılıb.
Bazarda təklif portfelində Yasamal, Nəsimi, Nərimanov və Xətai rayonlarının payı 78,7 faiz təşkil edib. Portfelin uzun müddət ərzində bu dörd rayon hesabına formalaşması həmin rayonlardakı yeni tikililərin bazara çıxarılması ilə əlaqədardır. Araşdırmalar göstərir ki, ilkin mənzil bazarında da portfel əsasən bu dörd rayon hesabına formalaşır.
Bazara orta qiymətdən aşağı təklif olunan təkrar mənzillərin payı 53,3 faiz təşkil edib. Mayda təkrar bazarda təklif olunan orta otaq göstəricisi 2,79, hər otağın orta qiyməti - 44 431 dollar, mənzillərin qiyməti isə 111 479 dollar təşkil edib.
İyunun 30-na rəsmi məzənnə 0,7856 AZN/USD təşkil edir.
