Azərbaycan, Bakı, 11 avqust /Trend, müxbir A.Axundov/
2012-ci ilin II rübü ərzində Azərbaycanın bank sektorunun kapitallaşması 2,73 faiz artaraq, 2011-ci il iyunun sonu ilə müqayisədə isə 2,03 faiz azalaraq bu il iyulun 1-nə 2,22 milyard manat təşkil edib. Trend-in məlumatına görə, bu barədə Azərbaycan Mərkəzi Bankının (AMB) maliyyə sabitliyi hesabatında deyilir.
AMB-nin məlumatına görə, kapitalı 10 milyon manatı üstələyən bankların sayı iyun ayının yekunları üzrə 40 ədəd təşkil edib. Bu, əvvəlki ayla müqayisədə 2 ədəd, 2011-ci ilin I yarısına nisbətən isə 1 ədəd azdır.
İlin I yarısının yekunları üzrə bu kateqoriyadan olan bankların ölkənin bütün banklarının kapitalının məcmu həcmində xüsusi çəkisi 99,4 faiz təşkil edib. 2011-ci il iyulun 1-nə bu göstərici 98,9 faiz olub.
Hazırda 3 bank AMB-nin kapitallaşma üzrə tələblərini (kapitalın minimum həcmi 10 milyon manat olmalıdır) yerinə yetirmir. İki bankın kapitalı (0,8 faiz xüsusi çəki ilə) 5-10 milyon manat arasında formalaşdırılıb, üçüncü bankın kapitalı isə (0,2 faiz) 3,5-5 milyon manat arasındadır.