Azərbaycan, Bakı, 3 dekabr /Trend, müxbir A.Axundov/
Azərbaycanda ümumi vergi daxilolmalarında könüllü vergi ödənişinin payı ümumavropa səviyyəsinə yaxınlaşır. Bu barədə bazar ertəsi Trend-ə vergilər nazirinin müavini Sahib Ələkbərov deyib.
"Hazırda könüllü ödənişin 80 faiz səviyyəsində olmasını qənaətbəxş hesab edirəm. Məqsədimiz 85 faizə çatmaqdır. Lakin bunun üzərində çox işləmək lazımdır", - Ələkbərov qeyd edib.
Lakin, nazir müavininin fikrincə, bəzi hallarda ölkə vətəndaşları könüllü vergi ödəmək niyyətində olmurlar.
"İş orasındadır ki, Azərbaycanın vergi sisteminin 20 yaşı var, Vergilər Nazirliyi isə 11 il əvvəl yaradılıb. Azərbaycan vətəndaşının təfəkküründə könüllü vergi ödənişi anlayışı formalaşmayıb. Bu təfəkkür, insanların vergi mədəniyyəti dəyişməlidir. Bunun üzərində iş gedir, əhalinin maarifləndirilməsi, şəffaflığın artırılmasına dair çoxsaylı layihələr mövcuddur. Hesab edirik ki, bu, müsbət irəliləyişdir və gələcəkdə bu məsələlər öz həllini tapacaq", - Ələkbərov vurğulayıb.
