Azərbaycan, Bakı, 20 dekabr /Trend, müxbir A.Axundov/
Azərbaycanın "Anglo-Asian Mining plc" şirkəti Ordubaddakı yataqdan ilk qızılı 2014-cü ildə əldə etməyi planlaşdırır. Bu barədə cümə axşamı Trend-ə şirkətin prezidenti Rza Vəziri bildirib.
Yataq bu ilin əvvəlində Naxçıvan Muxtar Respublikasındakı 462 kvadratkilometrlik müqavilə sahəsində aşkar edilib. Mayda şirkət bu barədə ölkənin Ekologiya və Təbii Sərvətlər Nazirliyini xəbərdar edib. Hazırda şirkət kiçik istehsal potensialına malik qızıl yatağının mövcudluğunu təsdiqləmək məqsədilə gələcəkdə kəşfiyyat işlərinin aparılmasını planlaşdırır.
"Biz 2013-cü il yanvarın sonuna kimi yatağın işlənməsi və orada istehsala başlamaq üzrə proqramı hökumətə təqdim edəcəyimizə ümid edirik. 2013-cü ilin sonu, 2014-cü ilin əvvəllərində bu yataqda kəşfiyyat qazması üzrə proqramı başa çatdırmağı planlaşdırırıq. Bundan sonra istehsala başlaya biləcəyik", - Vəziri deyib.
Qeyd edək ki, şirkət 2009-cu ildən Gədəbəy yatağında qızıl hasil edir və 2013-cü ildə Qoşa yatağında istehsala başlamağı planlaşdırır.
