Azərbaycan, Bakı, 22 yanvar /Trend, müxbir A.Axundov/
Vergilər Nazirliyi "Azərbaycan 2020: Fələcəyə baxış" İnkişaf Konsepsiyasında vergi orqanları qarşısında qoyulan tapşırıqların yerinə yetirilməsi üçün tədbirlər planı hazırlayır. Trend-in məlumatına görə, bu barədə çərşənbə axşamı vergilər nazirinin birinci müavini Natiq Əmirov mətbuat konfransında bildirib.
"Konsepsiyada vergi orqanları qarşısında da müəyyən tapşırıqlar qoyulub. Hazırda Vegilər Nazirliyi tərəfindən nazirliyin bütün fəaliyyət sahələrini əhatə edəcək geniş strateji tədbirlər planı hazırlanır", - Əmirov vurğulayıb.
Onun sözlərinə görə, tədbirlərə nazirlik tərəfindən bütün xidmətlərin elektron formada təqdim edilməsi, investisiya mühitinə daha böyük dəstək vermək üçün vergi qanunvericiliyinin təkmilləşdirilməsi, qanunvericiliyi Avropa səviyyəsinə çatdırmaq, vergi dərəcələrinin optimallaşdırılması, habelə bəzi dərəcələrin azaldılması və vergi inzibatçılığının təkmilləşdirilməsi daxildir.
"Tədbirlər planı yaxın aylarda təsdiq ediləcək", - Əmirov deyib.
