Azərbaycan, Bakı, 4 iyun /Trend, müxbir E.Əliyev/
İdxal zamanı gömrük rüsumlarından azad olunması təklif edilən məhsul və ya malların seçiminə çox diqqətlə yanaşmaq lazımdır. Trend-in məlumatına görə, bu barədə jurnalistlərə Dövlət Gömrük Komitəsinin (DGK) Maliyyə-Tarif və Valyuta Nəzarəti Baş İdarəsinin rəisi, general-mayor Mirqasım Vahabov bildirib.
Vahabov deyib: "Bizə müxtəlif strukturlardan gömrük güzəştləri ilə bağlı müraciətlər daxil olur. Müraciətlərin əksəriyyətində quşçuluq müəssisələri ölkəyə idxal olunan yemlərin gömrük rüsumlarından azad olunmasını xahiş edir. Ölkədə kifayət qədər lazımi xammal istehsal edildiyindən və yerli istehsalçıları dəstəkləməyə çalışdığımızdan bu tədbirlərin məqsədəuyğun olmadığını hesab etdik".
O vurğulayıb ki, eyni zamanda ölkəyə idxal olunan taxılın gömrük rüsumlarından və ƏDV-dən müvəqqəti azad olunması barədə hökumətin qərarı çox doğru idi.
Vahabov bildirib: "Dövlət Statistika Komitəsinin məlumatına görə, ölkədə taxıla olan tələbatın 30 faizi idxal hesabına qarşılanır. Xaricdən idxal olunan taxıla ƏDV-nin və gömrük rüsumlarının tətbiqi çörəyin maya dəyərini və istehlakçılar üçün qiymətini artıracaq. Bununla əlaqədar olaraq, hökumətin qərarı düzgün və vaxtında idi".