Azərbaycan, Bakı, 13 iyun /Trend, müxbir E.Əliyev/
Azərbaycanın qeyri-neft sektoruna 360 milyon dollardan çox Niderland sərmayəsi yatırılıb. Trend-in məlumatına görə, bu barədə cümə axşamı Bakıda keçirilən Azərbaycan-Belçika-Niderland biznes forumunda Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov bildirib.
Məmmədov qeyd edib: "Azərbaycan, Belçika və Niderland arasında həm siyasi, həm də ticari-iqtisadi sahədə sıx əlaqələr qurulub. Son illər ərzində təkcə Niderlanddan ölkənin qeyri-neft sektoruna 360 milyon dollardan çox birbaşa sərmayə yatırılıb. Belçika şirkətləri də Azərbaycanı "kəşf ediblər". Ölkədə artıq Belçika sərmayəsi ilə 16 şirkət fəaliyyət göstərir. Bugünkü biznes forum üç ölkə arasında əməkdaşlığın işinə böyük töhfə verəcək və biz inanırıq ki, Azərbaycan, Belçika və Niderland arasında əlaqələr genişlənəcək və dərinləşəcək".
Fondun rəhbərinin sözlərinə görə, ölkələr arasındakı əməkdaşlıq müxtəlif fəaliyyət sahələrini əhatə edir: "Bu maliyyə, yüksək texnologiyalar, sənayenin müxtəlif sahələri, o cümlədən qida sənayesi və kənd təsərrüfatı sektorlarıdır. Bundan əlavə, alternativ enerji mənbələri sahəsində əməkdaşlıq inkişaf edir. Belçika və Niderland şirkətləri məhz bu sahədə Azərbaycanla əməkdaşlığa böyük maraq göstərir".
Məmmədov bildirib ki, forum çərçivəsində əməkdaşlıq məsələlərinin müzakirəsi ilə yanaşı, Azərbaycanın investisiya imkanları təqdim olunur.
Qeyd edək ki, Azərbaycan-Belçika-Niderland biznes forumu AZPROMO tərəfindən təşkil olunub.
