Azərbaycan, Bakı, 9 oktyabr /Trend, müxbir E.Əliyev/
Beynəlxalq Valyuta Fondu (BVF) 2013-cü ilin nəticələri üzrə Azərbaycanda ümumi daxili məhsulun (ÜDM) real atımını 3,5 faiz səviyyəsində proqnozlaşdırır. Trend-in məlumatına görə, bu barədə BVF-nin oktyabr ayı üzrə "Word Economic Outlook" proqnozunda deyilir.
Hesabata əsasən, gələn il ölkə ÜDM-nin artım tempi 5,6 faizədək artacaq.
Sənəddə deyilir: "Azərbaycan və Türkmənistan hökumətləri inflyasiyanı cari səviyyədə saxlamaq üçün fiskal stimullaşdırmadan imtina etməli, həmçinin dövlət xərclərinin effektivliyini möhkəmləndirməyi davam etdirməlidir".
Proqnozlara əsasən, 2013-2014-cü illərdə Azərbaycanda işsizlik ötən il olduğu kimi 6 faiz səviyyəsində qalacaq.
BVF-nin gözləntilərinə görə, ümumilikdə MDB ölkələrində ÜDM-in artım tempi ötən ildəki 3,5 faizdən cari ilin sonuna 2 faizədək azalıb. 2014-cü ildə regionun ÜDM artımı 3,5 faiz səviyyəsində proqnozlaşdırılır.