Azərbaycan, Bakı, 11 dekabr /Trend, müxbir E.Əliyev/
Azərbaycanda sığorta agentləri icbari attestasiyadan keçəcəklər. Trend-in məlumatına görə, bu barədə çərşənbə günü Bakıda keçirilən Sığorta Agentlərinin II Milli Forumunda Maliyyə Nazirliyi yanında Dövlət Sığorta Nəzarəti Xidmətinin Lisenziyalaşdırma, ərizə və şikayətlər şöbəsinin rəhbəri Mahir Abdullayev deyib.
M.Abdullayev bildirib: "Sığorta fəaliyyəti haqqında qanuna dəyişikliklər yaxın gələcəkdə qüvvəyə minəcək. Attestasiya agentə lisenziyanın verildiyi andan üç ildə bir dəfə keçiriləcək. Agent birbaşa vətəndaşlarla çalışan şəxslər kimi müvafiq qanunvericilikdəki son dəyişikliklər barədə zərurui biliklərə və tələb olunan ixtisasa malik olmalıdır".
Onun sözlərinə görə, eyni zamanda, bu, sığorta edənlərə verilən lisenziyanın müddətinin məhdudlaşdırılması demək deyil.
Şöbə müdirinin sözlərinə görə, "bir müddət əvvəl bəzi kütləvi informasiya vasitələri qanunda planlaşdırılan dəyişikliklərdən səhv nəticələr çıxardılar. Lisenziyalar müddətsiz verilir və veriləcək, attestasiya yoxlama xarakteri daşıyacaq".
Abdullayev, həmçinin bildirib ki, dəyişikliklərə əsasən, tərəflər arasında bağlanan müqavilələr yol verərsə, sığorta agentləri bir neçə sığorta edənlə işləyə biləcəklər.
Bakıda Azərbaycan Sığorta Agentlərinin II Milli Forumu keçirilir. Forumda ölkənin sığorta şirkətlərinin, dövlət strukturlarının 200-dən artıq nümayəndəsi və ekspertlər iştirak edirlər. Forum iştirakçıları Azərbaycanın sığorta bazarının problemlərini, eləcə də onun inkişafının perspektivlərini müzakirə edirlər.
