Azərbaycan, Bakı, 3 aprel /Trend, müxbir E.İsmayılov/
Naxçıvan-Qars (Türkiyə) dəmiryol nəqliyyatının yaradılması üzrə daha fəal işlər Bakı-Tbilisi-Qars dəmiryolunun istismara verilməsindən sonra başlayacaq. Bu barədə Trend-ə "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib.
N.Əzməmmədov qeyd edib ki, Naxçıvan-Qars marşrutu üzrə dəmiryolun yaradılması məsələsi aktualdır və bu layihə çərçivəsində daha fəal proses Bakı-Tbilisi-Qars dəmiryolunun istismara verilməsindən sonra gedəcək.
İlkin məlumatlara görə, bu layihənin həyata keçirilməsi üçün bir milyard manat vəsait tələb olunur.
Bakı-Tbilisi-Qars dəmiryolunun yaradılması çərçivəsində işlərə toxunan N.Əzməmmədov deyib ki, layihə çərçivəsində işlər davam edir və müəyyən edilmiş qrafikə uyğun aparılır.
Onun sözlərinə görə, bu dəmiryolun işə salınmasına hazırlıq çərçivəsində həm yük, həm də sərnişin qatarlarının hərəkəti üzrə qrafik tərtib olunacaq: "Lakin ilk növbədə bu dəmiryol yüklərin daşınması baxımından vacibdir".
