Azərbaycan, Bakı, 23 sentyabr /Trend, müxbir Azad Həsənli/
Azərbaycanın qızıl istehsalçısı Anglo-Asian Mining plc (ААМ) şirkəti bu ilin birinci yarısında "Gədəbəy" mədən kompleksindən çıxarılan 27 054 unsiya qızıl istehsal edib. Trend xəbər verir ki, bu barədə çərşənbə axşamı şirkətin saytında dərc edilmiş məlumatda deyilir.
Müqayisə üçün, 2013-cü ilin yanvar-iyun aylarında şirkət 17 497 unsiya qızıl istehsal edib.
Hesabat dövründə şirkət hər unsiyanın orta qiyməti 1 297 dollar olmaqla 23 545 unsiya qızıl istehsal edib. Müqayisə üçün, ötən ilin birinci yarısında bu göstərici hər unsiyanın orta qiyməti 1 561 dollar olmaqla 14 229 unsiya olub.
2014-cü ilin birinci yarısında 21 924 unsiya gümüş istehsal olunub. Müqayisə üçün, ötən ilin birinci yarısında 10 661 unsiya gümüş istehsal olunub.
Məlumata görə, bu ilin sonuna kimi "Gədəbəy" və "Qoşa" yataqlarında 62 min unsiya qızılın istehsal edilməsi planlaşdırılır. Həmçinin bu maliyyə ili ərzində SART metodu ilə 750 ton mis istehsal edilməsi nzəərdə tutulub.
2014-cü ilin birinci yarısında şirkətin gəlirləri ötən ilin analoji dövrü ilə müqayisədə 18,5 faiz artaraq 32,7 milyon dollar olub.
Şirkət ilin birinci yarısını 7,5 milyon dollar zərərlə başa vurub. Halbuki ötən ilin analoji dövründə 4,2 milyon dollar mənfəət əldə etmişdi.
Məlumatda şirkətin sədri Xosrov Zamaniyə istinadən bildirilir: "Qeyd etmək lazımdır ki, qızıl hasil edən şirkətlər üçün bu, mürəkkəb dövrdür. ААМ üçün qızılın qiymətlərinin azalması bu ilin birinci yarısında onun gəlirlərinin və rentabelliliyinin azalmasına təsir göstərib. Gəlirlərimizin 32,7 milyon dollar olmasına baxmayaraq, vergidən əvvəlki zərərimiz 7,5 milyon dollar təşkil edir".
Onun sözlərinə görə, 2014-cü ilin birinci yarısında şirkət hər unsiyanın orta qiyməti 1 297 dollar olmaqla 23 545 unsiya qızıl satıb. İlk altı ay ərzində istehsal olunan və satılan qızıl arasında fərq onunla izah edilir ki, pay bölgüsü haqqında sazişə görə, Azərbaycan hökuməti istehsal və satış arasındakı gözləmə dövründə də istehsal olunan bütün metalların 12,75 faizinə sahibdir.
İlk altı ayda şirkətin ümumi zərəri 0,8 milyon dollar olub. Halbuki ötən ilin analoji dövründə ААМ-ın ümumi mənfəəti 9,3 milyon dollar təşkil edib.
Əməliyyat fəaliyyətindən işçi kapitalına yerləşdirməyədək pul axını 2,1 milyon dollar (2013-cü ilin birinci yarısında 10,5 milyon dollar) olub. İlin birinci yarısında satılan məhsulun maya dəyəri 33,5 milyon dollar (ötən ilin yanvar-iyununda 18,3 milyon dollar) olub.