Azərbaycan, Bakı, 18 noyabr /Trend, müxbir Təmkin Cəfərov/
Təbrizdən Tacikistanın Xocənd şəhərinə birbaşa aviareysin açılması ilə bağlı iki ölkənin rəsmiləri Təbrizdə müzakirə aparıblar. Bu barədə Trend "Fars" agentliyinə istinadən məlumat verir.
Məlumata əsasən, bu barədə müzakirələr Tacikistanın Suğd vilayətinin Xocənd şəhərinin meri Əbdürrəhman Qadirinin Təbrizdə Şərqi Azərbaycan əyalətinin Ticarət Palatasının üzvləri ilə görüşündə aparılıb.
Görüşdə Ə.Qadiri deyib ki, Xocənd şəhərində yerləşən Suğd azad ticarət zonasında digər ölkələrin sərmayə yatırması üçün əlverişli şərait yaradılıb və xarici investorlara xüsusi güzəştlər edilib. "Belə güzəştlərdən biri kimi, vergidən uzunmüddətli azad olunmanı göstərmək olar".
Onun sözlərinə görə, Suğd azad ticarət zonası və Xocənd şəhərində 2007-ci ildən indiyədək 10 dəfə İran məhsullarının xüsusi sərgisi təşkil olunub: "Suğd azad ticarət zonasında ABŞ, Türkiyə, Çin və İran investorları tərəfindən xeyli sərmayə yatırılıb və onlara güzəştlər olunur".
Ə.Qadiri bildirib ki, Suğd azad ticarət zonasında kənd təsərrüfatı, sənaye və mədənlər sahələrinə sərmayə yatırmaq üçün potensial var və hazırda ABŞ və Kanada şirkətləri bu sahələrə sərmayə yatırır.