Azərbacan, Bakı, 19 noyabr /Trend, müxbir Azad Həsənli/
Azərbaycanda qızıl istehsalçısı olan "Anglo-Asian PLC" (AAM) şirkəti "Gədəbəy" mədən kompleksində mis ehtiyatlarının qiymətləndirilməsini yüksəldib.
Trend-in şirkətin saytına istinadən verdiyi məlumata əsasən, 2012-ci ilin may ayının göstəricisi ilə müqayisədə mis ehtiyatları 96 faiz artaraq 117 min tona çatıb: "Çıxarılan mis ehtiyatları isə 5 dəfə artaraq 68 min tona çatıb".
AAM-in baş direktoru Rza Vəziri qeyd edib ki, çıxarılan mis ehtiyatlarının qiymətləndirilməsinin artırılması şirkətin "Gədəbəy" mədəninin polimetallik mədənə çevrilməsi üzrə inkişaf strategiyasının nəticəsidir: "Bu məqsədlə yüksək mis tərkibli sulfid filizlərinin işlənməsi üçün flotasiya qurğusu istismara verilib".
Ümumilikdə şirkət ilin əvvəlindən 580 ton mis istehsal edib. İlin sonunadək SART metodu ilə misin ümumi hasilat həcmini 750 tona çatdırmaq planlaşdırılır.
