Bu gün Cenevrədə Beynəlxalq Sosial Təminat Assosiasiyasının (BSTA) 92-ci iclası öz işinə başlayıb. Dövlət Sosial Müdafiə Fondunun (DSMF) mətbuat xidmətindən Trend xəbər agentliyinə verilən məlumata görə, tədbirdə Azərbaycanı fondun sədri Səlim Müslümovun rəhbərlik etdiyi nümayəndə heyəti təmsil edir. İki gün davam edəcək iclasda 91-ci iclas və baş katibin seçilməsi ilə əlaqədar seçki komitəsinin hesabatı dinləniləcək, baş katib vəzifəsinə seçkilər keçiriləcək.
İclasda, həmçinin, 2007-ci ildə keçiriləcək 29-cu baş assambleyada BSTA-nın nizamnaməsinə ediləcək dəyişikliklər, eyni zamanda 2008-ci ildə təhlükəsizlik və sağlamlıq üzrə 18-ci dünya konqresinin keçirilməsi məsələləri də müzakirə ediləcək. Səfər zamanı Azərbaycan nümayəndə heyətinin iclasda iştirak edən digər ölkələrin sosial müdafiə qurumlarının nümayəndələri ilə də görüşləri nəzərdə tutulur.
Qeyd edək ki, ötən ilin əvvəlində DSMF BSTA-ya tamhüquqlu üzv qəbul edilib. Hazırda isə BSTA özündə dünyanın 148 dövlətindən 275 sosial müdafiə təşkilatını birləşdirir. 1927-ci ildə təsis edilmiş təşkilatın əsas məqsədi əhalinin sosial müdafiəsi sahəsində vahid siyasətin həyata keçirilməsindən, sosial sığorta sisteminin təkmilləşdirilməsindən və digər problemlərin həllinə yardım etməkdən ibarətdir.