Nazirlər Kabineti "Azərbaycan Respublikasının ərazisinə gətirilən aksiz vergisinə cəlb edilən malların aksiz dərəcələrinin təsdiq edilməsi haqqında" qərara dəyişikliyi təsdiq edib. Trend in məlumatına əsasən, Nazirlər Kabinetinin qərarında deyilir ki, aksiz dərəcələri Beynəlxalq Harmonik Sistemin yeni variantlarına uyğunlaşdırılması məqsədilə aksiz dərəcələri yeni mətndə təsdiq olunmalıdır.
Bu sənəddə həm də aksiz markası tətbiq olunan məhsulların yeni qiymətləri və çeşid nomenklaturaları da göstərilib. Beləliklə, 80%-dən az və çox sıxlığa malik olan denaturasiya olunmamış etil spirtinin 1 litri üçün 1 ABŞ dolları, təbii üzüm şərabları və digər qıcqırdılmış içkilərin 1 litri üçün 1,5 ABŞ dolları, viski və rom məhsullarının 1 litri üçün 3 ABŞ dolları, araq (vodka), likör və başqa meyvələrdən çəkilən spirtli içkilərin 1 litri üçün 3 ABŞ dolları, tütündən hazırlanan siqaretin 1000 ədədi üçün idxalçılar 1,8 ABŞ dolları ödəməli olacaq.
Emalın spesifik prosesləri üçün yüngül və orta destilyatların, həmçinin ağır destilyatların, dizel yanacağının 1 tonu üçün 100 ABŞ dolları, aviasiya benzinləri istisna olmaqla mühərrik benzinlərinin bütün növləri üzrə 1 ton üçün 250 ABŞ dolları, digər xüsusi benzinlər, aviasiya benzinləri, reaktiv benzin yanacağı, maye yanacağı, sürtkü yacları, hidravlik yağlar, maye qaz, şəffaf yağlar (vazelin yağı) və s. bu kimi məhsulların 1 tonu üçün 1 ABŞ dolları aksiz dərəcəsi müəyyən edilib. Belə aksiz dərəcəsi təbii bitum və asfalt və digər məhsulların 1 tonu üçün də müəyyən edilib.
