2006-cı ilin I rübünün yekunlarına görə, sadələşdirilmiş vergitutma sistemi üzrə 86,8% vergi ödəyicisi öz vergi bəyannamələrini vergi orqanlarına vaxtında təqdim edib. Trend in xəbər verdiyi kimi, bu barədə aprelin 27-də keçirilmiş mətbuat konfransında Vergilər Nazirliyinin vergi ödəyicilərinə xidmət idarəsinin rəisi Elçin Məmmədov bildirib.
Bununla yanaşı, bəyannamələrin təqdim edilmə səviyyəsinin 4% artdığı qeyd olunur. Sadələşdirilmiş sistem üzrə ümumi sayı 80 490 olan vergi ödəyicilərindən 69 830-u könüllü əsasda öz bəyannamələrini təqdim edib. Bunun üçün aprelin 20-si son müddət idi.
Daha böyük göstərici Qəbələ (96,8%), Lənkəran (94%), Şəmkir (93,3%) və Göyçay (93,9%) Ərazi Vergi Orqanlarında qeydə alınıb. E.Məmmədov ümid edir ki, 2007-ci ildən başlayaraq könüllü bəyannamələri təqdim etmənin səviyyəsi daha da artacaq.