Nəqliyyat nazirinin birinci müavini Musa Pənahovun Trend agentliyinə verdiyi məlumata görə, Azərbaycan dəmir yolu lokomativ parkının modernləşdirilməsi layihəsində öz iştirak payını artırmaq məsələsini nəzərdən keçirir. Onun sözlərinə görə, hazırda Azərbaycan bu layihə üçün təxminən 10 mln. yeni manat verməyə hazırdır. Lakin indi Azərbaycan tərəfi bu vəsaitin artırılması mümkünlüyünü nəzərdən keçirir.
Bu vəsait dövlət büdcəsindən ayrıla bilər. Ehtimallara görə, Azərbaycan layihə üçün lazım olan vəsaitin yarısını verə bilər.
Aprelin 25-də Avropa Bankı növbəti dəfə Dövlət Dəmir Yolu İdarəsi üçün nəzərdə tutulmuş ikinci kreditin müzakirəsini təxirə salaraq bu ilin iyun ayına keçirib. Ola bilsin ki, Azərbaycan bu vaxtadək büdcə göstəricilərini nəzərdən keçirsin.
Ehtimallara görə, Avropa Bankı dəmir yolu lokomotiv parkının modernləşdirilməsi və bərpasına 30 mln. dollar həcmində kredit ayıracaq. Kredit 15 il müddətinə 4 illik güzəşt və Libor +1% dərəcəsilə veriləcək. Azərbaycan Dəmir Yolu İdarəsi ikinci mərhələ çərçivəsində daha 20 mln. dollar almaq niyyətindədir. Bu vəsait lokomotivlərin təmiri üçün iki deponun tikintisinə sərf olunacaq. ADYİ 1999-cu ildə də Avropa Bankından 20,2 mln. dollar həcmində kredit almışdır.
Lokomotiv parkının modernləşdirilməsi TRACECA dəhlizi vasitəsilə yük daşınmalarının ilbəil artması, eləcə də Qars-Axalkalaki-Tbilisi-Bakı dəymir yolu və Şimal-Cənub nəqliyyat dəhlizi kimi layihələrin gerçəkləşdirilməsi ilə əlaqədardır.