Avropa Yenidənqurma və İnkişaf Bankı (AYİB) iyunun 30-da Mingəçevirdəki AzİES-in yenidənqurulma layihəsi üzrə kredit və zəmanət razılaşmasının surətlərini Azərbaycan hökümətinə təqdim edib. Nazirlər kabinetindən Trend ə verilən məlumata görə, kredit razılaşması "Azərenerji" SC-yə, dövlət zəmanətinin təqdim olunması üzrə saziş isə Maliyyə nazirliyinə göndərilib.
AYİB-in Direktorlar şurası iyunun 27-də layihənin reallaşması üçün 115 milyon ABŞ dolları məbləğində kredit ayırıb. Beşinci blok istisna olmaqla, 1-dən 8-ə qədər blokların yenidənqurulması 135 milyon ABŞ dolları məbləğində (vergi nəzərə alınmadan) qiymətləndirilir. Kredit Avropa bankının standart şərtləri ilə veriləcək: ödənişi üç il gecikdirməklə 15 il müddətinə və libor+1% faiz dərəcəsi ilə. Lakin kreditin mənimsənilməmiş hissəsi üzrə libor +0,5% dərəcəsi üzrə faiz hesablanacaq. Bu, kredit resurslarından istifadə prosesinin tezləşdirilməsi ilə bağlıdır.
İstənilən halda, "Azərenerji" mazut və təbii qazla işləyən 300 mV AzİES-in (Bakıdan 300 km qərbdə) tikinti işlərinin başlanması prosesini tezləşdirməyə çalışır və müvafiq olaraq, kreditdən də tez istifadə olunacaq. AYİB-in kredit vəsaitləri, əsasən, turbin avadanlığının reabilitasiyasına və ətraf mühitin yaxşılaşdırılması üzrə tədbirlərin həyata keçirilməsinə yönəldiləcək.
Stansiya 20 ildən artıq işləyir və təcili surətdə təkmilləşdirilməlidir, çünki elektrik enerjisinin əsas hissəsinin tədarükçüsü kimi ölkə üçün böyük əhəmiyyətə malikdir. Təkmilləşdirmə layihəsinin məqsədi - layihə gücünə çatmaq üçün zavodun ümumi effektivliyinin artırılmasından ibarətdir.
