Respublika üzrə kənd təsərrüfatı məhsullarının satış yarmarkaları daimi əsasda təşkil olunacaq və birdəfəlik xarakter daşımayacaq. Trend in xəbər verdiyi kimi, bu barədə iyulun 18-də 2006-cı ilin birinci yarımilinin yekunlarına həsr olunmuş mətbuat konfransında Dövlət Statistika Komitəsinin sədri Arif Vəliyev bildirib.
Onun sözlərinə görə, belə qərar dünən Nazirlər Kabinetində Prezident Aparatının başçısı Ramiz Mehdiyevin sədrliyi ilə keçirilmiş müşavirədə qəbul olunub. Müşavirə son vaxtlar müşahidə olunan, kənd təsərrüfatı məhsullarının qiymətinin artması ilə əlaqədar çağırılıb.
A.Vəliyev hesab edir ki, yarmarkaların təşkili rəqabət yaratmağa şərait yaradacaq ki, bu da ölkədə bazar qiymətlərinin aşağı düşməsinə imkan verəcək. Bundan başqa, satışda kənd təsərrüfatı məhsullarını qiyməti bazar qiymətlərindən bir dəfə ucuz olacaq. İlk yarmarkaların paytaxt rayonlarında təşkil edilməsi planlaşdırılır.
Müşavirədə qiymətlərin bahalaşmasının əsas səbəblərindən biri kimi bazarda inhisarçılıq adlandırılıb ki, nəticədə də məhsul istehsalçısı çətinliklə yetişdirdiyi məhsulu ya qapısında, ya da bazarın qarşısında möhtəkirlərə satmaq məcburiyyətində qalır.
