İyulun 27-də Bakıda Azərbaycan-Türkiyə Hökumətlərarası Komissiyasının 4-cü iclası keçirilib. Trend in məlumatına görə, iclasda Türkiyənin baş nazirinin müavini Mehmed Aydın, Azərbaycan baş nazirinin müavini Abid Şərifov iştirak ediblər.
İclasdan sonra jurnalistlərə açıqlama verən Abid Şərifov bildirib ki, toplantıda əsasən Naxçıvanın Türkiyəyə olan borcu, nəqliyyat və digər məsələlər barədə müzakirələr aparılıb. A.Şərifovun sözlərinə görə, Naxçıvanın Türkiyəyə olan borcunun başqa formada ödənilməsi ilə bağlı təkliflər var və hazırda bu məsələ müzakirə mövzusudur: "Təkliflər var ki, Türkiyəyə olan borcu bir neçə ildən sonra enerji ilə qaytara bilərik. Yəni, bir-iki ilə Naxçıvanda qazın gəlməsi ilə əlaqədar elektrik stansiyaları konstruksiya olunur. Ona görə də fikirləşirik ki, borcu pulla yox, enerji ilə qaytaraq".
Baş nazirin müavini deyib ki, nəqliyyat sahəsində əlaqələr barədə də müzkirələr aparılıb. A.Şərifovun sözlərinə görə, Azərbaycan tərəfi nəqliyyat vasitələrinə verilən icazə vərəqələrini 2500-3000 minə çatdırıb: "Azərbaycana gələn Türkiyəyə məxsus yük maşınları vergisiz keçir. Onlar bu yük maşınlarının sayını artırmaq istəyirlər. Bu məsələlər də qarşılıqlı şəkildə danışıqlarda müzakirə edilməlidir. Həmçinin türk neft şirkətləri Azərbaycanda fəaliyyətlərini genişləndirmək istəyirlər. Bu da gələcəkdə müzakirə olunası işlərdir, indi baxılması hələ tezdir".