Beynəlxalq maliyyə korporasiyasının (İFC) Azəriqazbank səhmdar-investisiya bankının (AGBank) səhmdarlarının tərkibinə daxil olması haqqında müqavilə sentyabrın 15-dək imzalanacaq. Bu barədə Trend ə bankın Müşahidə şurasının sədri Çingiz Əsədullayev bildirib. Onun sözlərinə görə, sentyabrın 15-də AGBank-ın səhmdarlarının toplantısının keçirilməsi planlaşdırılıb.
Ç.Əsədullayevin qeyd etdiyi kimi, ötən həftənin sonundan maliyyə korporasiyası və Asiya inkişaf bankı ilə məsləhətləşmələrə başlanılıb. İFC ilə müqavilə korporasiyanın rəsmi şəxslərinin yaxın gələcəkdə nəzərdə tutulan səfəri zamanı imzalana bilər, lakin texniki səbəblərə görə AİB ilə sazişin imzalanma vaxtı müəyyənləşdirilməyib.
"Asiya bankı bildirib ki, sənədlərin hazırlıq işləri uğurla gedir, amma beynəlxalq təşkilatın əməkdaşlarının məzuniyyət müddəti ilə bağlı texniki səbəblər var", - deyə Ç.Əsədullayev qeyd edib. Əvvəl üçtərəfli müqavilənin avqustun axırında imzalanacağı barədə razılıq əldə olunmuşdu.
Beynəlxalq maliyyə institutlarına veriləcək ümumi səhm paketi 35% təşkil edir.
Onlar paritet münasibətlərlə daxil olacaq və hər biri 17,5% səhm əldə etmək üçün eyni həcmdə sərmayə verəcək. BMK artıq Azəriqazbankda 17,5% iştirak payını almaq üçün 2,3 mln. ABŞ dolları ödədiyini bildirib.
Hazırda bankın nizamnamə kapitalı 7,4 mln. manat, ümumi kapital isə təxminən 9 mln. manat təşkil edir. İlin sonunadək nizamnamə kapitalı 12 mln. manata çatdırılacaq.
