Azərbaycan Dövlət Gömrük Komitəsinin (DGK) rəhbərlərindən və beynəlxalq məsləhətçilərindən ibarət nümayəndə heyəti Brüsseldə işgüzar səfərdə olacaq. BMT-nin Azərbaycandakı İnkişaf Proqramı (BMT İP) ofisindən Trend -ə xəbər verilib ki, DGK-nin sədr müavini Əsgər Abdullayevin rəhbərliyi ilə nümayəndə heyətinin səfəri 20 noyabrdan 25 noyabra kimi "Azərbaycanın gömrük sisteminin təkmilləşdirilməsi" layihəsi çərçivəsində olacaq.
"Azərbaycanın yeni gömrük məcəlləsinin ilkin variantının hazırlıqları sona çatıb və məcəllənin əsas məqsədi Avropa Birliyinin müvafiq strukturlarında sənədin müzakirəsindən, bu istiqamətdə fikir mübadiləsi aparmaqdan, fikirləri, tösiyyələri və təklifləri qəbul etməkdən ibarətdir". Bunu BMT İP bildirib.
Avropa Komissiyasının vəsaiti ilə maliyyələşdirilən və BMT İP tərəfindən reallaşdırılan layihə 2006-cı ilin yanvarında başlanılıb. 900 min avro dəyərində olan layihənin məqsədi DGK-ya gömrük sahəsinin qanunvericilik bazasını təkmilləşdirmək, onu dünya standardlarına, xüsusilə də Avropa Birliyinin gömrük məcəlləsinə müvafiq həyata keçirmək, DGK-nın informasiya texnologiyalarının inkişafı srategiyasını təkmilləşdirmək və reallaşdırmaqdır.
