"Bu gün biz beynəlxalq standartlara keçməyə hazırıq. Ancaq bu, Azərbaycanın bir sıra müəssisələrinin fəaliyyətinə pis təsir edə bilər. Buna səbəb yerli şirkətlərin Avropa standartları üzrə məhsul istehsalına başlamaq üçün geniş imkanlara malik olmamasıdır. Trend in xəbər verdiyi kimi, bu barədə noyabrın 23-də Standartlaşdırma, Metrologiya və Patent üzrə Dövlət Agentliyinin baş direktoru Ramiz Həsənov məlumat verib.
"Bu səbəbdən biz fəaliyyətimizin əsas prinsipini müəyyən etmişik. Bu prinsip hər hansı məhsulun tərkibində insan orqanizmi üçün zərərli maddələrin olmasına yol verilməməsindən ibarətdir" - deyə o vurğulayıb.
R.Həsənov bildirib ki, yaxın vaxtlarda Standartlaşdırma Elmi-Tədqiqat İnstitutu fəaliyyətə başlayacaq və müəyyən sahələrdə Avropa standartlarının tətbiqinin məqsədyönlülüyünün müəyyən edilməsi istiqamətində iş aparacaq. Bu, hansı sahənin hansı vasitə ilə bu standartları qəbul etməyə hazır olmasından asılı olacaq.
"Bu gün biz hesab edirik ki, Avropa standartları qoz, sok istehsalı, üzümçülük və şərabçılıq sahəsində tətbiq oluna bilər", - deyə o vurğulayıb.
