2006-cı ilin yanvar-noyabr aylarının yekunu üzrə Azərbaycanda orta aylıq əmək haqqının məbləği 140,4 AZN təşkil edib, bu isə ötən ilin analoji dövrünün həcmindən 19,9% yüksəkdir. Bu barədə Trend ə Azərbaycan Dövlət Statistika Komitəsindən məlumat verilib.
Ən yüksək əmək haqqı hasilat sənayesində, maliyyə fəaliyyəti sahəsində, daşınmaz əmlakla əməliyyatlar, icarə və istehlakçılar sahəsində xidmətlərin göstərilməsi, eləcə də inşaat sektorunda işləyənlərdə qeydə alınıb.
11 ay ərzində orta əmək haqqı adambaşına düşən orta aylıq pul gəlirlərini 71,4% ötüb. Onların həcmi ötən ilin analoji dövrü ilə müqayisədə 21,2% artaraq, 100,3 manat təşkil edib.
Dekabrın 1-də adambaşına düşən nominal gəlirlər 1103,2 AZN təşkil edib, bu isə 2005-ci ilin 11 ayı ərzindəki göstəricidən 21,2% çoxdur. Adambaşına düşən real pul gəlirləri 22% artaraq 976,6 AZN təşkil edib.
Yanvar-noyabr aylarında Azərbaycan əhalisinin nominal pul gəlirləri 9223,2 mln. AZN təşkil edib, bu isə 2005-ci ilin 11 ayının göstəricisindən 28,2% çoxdur. Bu dövr ərzində əhalinin real pul gəlirləri 23,4% artaraq 8164,8 mln. AZN-ə çatıb. Yanvar-noyabr ərzində əhali mal və xidmətlərə şəxsi gəlirlərinin 70,2%-ni, vergilərin, sosial sığortanın və məcburi üzvlük haqlarının ödənilməsinə - 11,5%-ni, kapitalın toplanması və artırılmasına - 18,3% sərf edib.
11 ay ərzində əhalinin xərcləri gəlirdən 1689,4 mln. AZN az olub və 7533,8 mln. AZN təşkil edib. Bu isə ötən ilin müvafiq dövrünün xərclərindən 22,9% (6132,4 mln. AZN) çoxdur.
