Azərbaycan, Bərdə / Trend müxbir Ş.Cəliloğlu/ Azəbaycan Dövlət Neft Şirkəti (ADNŞ) tərəfindən Füzuli rayonunun ərazisində qaçqın və məcburi köçkünlərin yaşayışı üçün beş qəsəbənin inşasına başlanıb. Bu barədə bazar ertəsi Füzuli rayon İcra Hakimiyyətinin başçısı Nəbi Muxtarov məlumat verib. Onun sözlərinə görə, Füzulinin Zovcuq adlanan ərazisində 2104 köçkün ailəsinə tikilən yeni evlər bir və beş mənzildən ibarətdir. İnşası yeni başlayan qəsəbə elektrik enerjisi, daimi su təchizatı ilə təmin olunacaq, elm, səhiyyə, inzibati binalar fəaliyyət göstərəcək. Muxtarov onu da bildirib ki, digər qəsəbələrdən fərqli olaraq burada məsçid də inşa olunacaq.
Ağcabədi rayonunun Taxtakörpü adlanan obalığında məskunlaşan Laçın rayon məcburi köçkünləri üçün isə içməli su xətti çəkilib. Laçın rayon İcra Hakimiyyəti başçısının birinci müavini Arif Feyzullayevin bazar ertəsi verdiyi məlumata görə, yeni çəkilən su xəttinin köməyi ilə xüsusi quraşdırılmış nasoslar vasitəsi ilə Kür çayından mənbəyini götürən 62 km uzunluğunda boru vasitəsilə su 60 tonluq çənlərə yığılacaq və buradan 20 m uzunluğunda plastik borularla əhalinin məskunlaşdığı ərazilərə ötürüləcək. Lahiyənin qiyməti 98 min dollardır.
