Azərbaycan, Bakı /müx. Trend İ.Xəlilova / Dünya Bankının Azərbaycana büdcə prosesində texniki yardımı çərçivəsində Bakıya ölkə üzrə aparıcı iqtisadçısı Kristos Kostopolus gəlib. Kostopolusun bildirdiyinə görə, texniki yardım bütün istiqamətləri əhatə edir.
Dünya Bankı 2007-ci ilin əvvəlindən ilk dəfədir ki, belə texniki yardım göstərir. Layihənin reallaşdırılması üçün bankın məsləhətçisi kimi Andrey Strojok təyin edilib.
Texniki yardım çərçivəsində büdcənin hazırlığı prosesində bütün maraqlı dövlət strukturlarının koordinasiyası təmin edilir. Buraya Maliyyə, İqtisadi İnkişaf nazirlikləri və Milli Bank daxildir. Məsləhətçilərin təklif etdiyi modellər inflyasiya amili nəzərə alınaraq büdcə xərclərini düzgün təyin etmək imkanı yaradır.
Maliyyə Nazirliyində bu yardımı effektiv sayırlar. Mütəxəssislərin fikrincə, bu, büdcə proqnozlarının hazırlığı prosesində dövlət strukturlarının fəaliyyətini sistemləşdirməyə imkan verir.
Dünya Bankının ekspertlərinin yardımı ilə artıq 2008-ci il büdcəsi ilə bağlı proqnozlar hazırlanıb və hökumətə təqdim edilib.