Azərbaycan, Bakı, 20 iyun/ Trend / İran və Rusiya Azərbaycanın iştirakı ilə bu ölkələrin milli enerji sistemlərinin sinxronlaşdırılması layihəsi çərçivəsində elektrik enerjisinin alqı-satqı məsələsini həll ediblər. Bu barədə "Azərenerji" Səhmdar Cəmiyyətindən (SC) məlumat veriblər.
Bu məsələnin həlli Azərbaycan, Rusiya və İran arasında qarşılıqlı elektrik enerjisi mübadiləsini həyata keçirməyə, həmçinin regionun digər ölkələrini də bu layihəyə qoşmağa imkan verəcək, SC-nin nümayəndələri bildiriblər.
Əvvəllər Rusiya və İran arasında əməkdaşlığın forması haqqında danışıqlar aparılıb. Tərəflərdən biri elektrik enerjisinin qarşılıqlı satışına, digəri isə mübadiləsinə təkid edirdi.
Hazırda tərəflər daha miqyaslı layihəni - Azərbaycan (o cümlədən Naxçıvan Muxtar Respublikası), İran, Türkiyə, Gürcüstan və Rusiya arasında dairəvi elektrik mübadiləsi sisteminin yaradılması layihəsini nəzərdən keçirirlər. Türkmənistan da bu sistemə qoşulmaq arzusunu bildirir.
Belə sistemin yaradılması yalnız ölkələr arasında enerji mübadiləsi aparmağa deyil, həm də onun Avropaya ixracını həyata keçirməyə imkan verəcək. Azərbaycan Türkiyə bazarına çıxmaq üçün imkan əldə edəcək.
Hazırda Azərbaycan İranla enerji mübadiləsinin 700 MVt-dək artırılması üçün birgə layihə həyata keçirir. Layihənin başa çatması qış dövründə Naxçıvan Muxtar Respublikasına 150 MVt, ümumilikdə Azərbaycanın enerji sisteminə isə 400 MVt elektrik enerjisi tədarük etməyə imkan verəcək.
Proqram İranın "Sunir" şirkəti ilə birgə realizə edilir. Proqrama 330 kilovoltluq Əli Bayramlı İES - İmişli EÖX, İmişi-Parsabadın ikinci xəttinin, 220 kilovoltluq Əli Bayramlı İES - Salyn, Salyan - Masallı, Masallı - Astara elektrik ötürücü xəttinin (EÖX), həmçinin "Salyan" yarımstansiyasının tikintisi və daha dörd yarımstansiyanın genişləndirilməsi daxildir. EÖX-ün ümumi uzunluğu 350 km təşkil edəcək.
Azərbaycan və Rusiya arasında elektrik enerjisi mübadiləsi mövcud Dərbənd-Yaşma elektrik ötürücü xətti ilə həyata keçirilir.
Yeni 500 kilovoltluq elektrik ötürücü xəttin tikintisi haqqında sənəd Azərbaycan və Gürcüstan prezidentləri İlham Əliyev və Mixail Saakaşvilinin, həmçinin Türkiyənin Baş naziri Rəcəb Tayyip Ərdoğanın 2007-ci il fevralın 7-də Tbilisidə keçirilən görüşləri zamanı imzalanıb. Layihə bu ölkələr arasında elektrik enerjisi mübadiləsini nəzərdə tutur.
