Azərbaycan, Bakı, 10 sentyabr / Trend , müxbir E.İsmayılov/ "Regionda hasil edilən enerji daşıyıcılarının diversifikasiyası Azərbaycan və Türkmənistanın maraqlarına cavab verir, həmçinin digər dövlətlər, beynəlxalq təşkilat və şirkətlər tərəfindən bu məsələyə maraq var", - Azərbaycanın xarici işlər nazirinin müavini Xələf Xələfov çərşənbə günü Bakıda keçirilən "Azərbaycan və Türkmənistanın neft və qaz potensialı: energetika, iqtisadiyyat, ekologiya. Əməkdaşlıq Strategiyası" beynəlxalq konfransında bildirib.
"Başlıcası odur ki, konfrans, regionda böyük enerji potensialına malik Azərbaycan və Türkmənistanın beynəlxalq əməkdaşlıq sisteminə öz töhfələrini verə biləcəklərini göstərsin", - o qeyd edib. Xələfovun bildirdiyinə görə, Azərbaycna və Türkmənistan regional və beynəlxalq əməkdaşlığı, Xəzər hövzəsində yeni layihələrin realizəsini və üçüncü dövlət və şirkətlərin bu prosesdə iştirakını dəstəkləyir.
Konfransda yalnız karbohidrogen ehtiyatlarının işlənilməsi məsələləri deyil, bu ehtiyatların dünya bazarlarına çıxarılması yolları da müzakirə edilib.
Konfransın gedişində sərgi təşkil edilib. Sərgidə Azərbaycan və Türkmənistanda fəaliyyət göstərən dövlət və qeyri-dövlət təşkilatlarının imkanları təmsil olunub. "Bu gələcək əməkdaşlığın inkişafı üçün çox yaxşı imkandır", - xarici işlər nazirinin müavini bildirib. Konfrans çərçivəsində həm Azərbaycan və Türkmənistan, həm də digər dövlətlərin şirkət və dövlət strukturları arasında, o cümlədən əcnəbi şirkətlərlə danışıqlar aparılıb. Bir sıra layihələr üzrə müzakirələr aparılıb.
"Ümid edirəm ki, konfrans və bu konfrans çərçivəsində aparılan rəy mübadiləsi yaxşı töhfə verəcək və regionda gələcək enerji və kommunikasiya layihələrinin inkişafına yardım göstərəck", - Xələfov vurğulayıb.
Azərbaycanın sənaye və energetika naziri Natiq Əliyevin konfransda bildirdiyinə görə, ilk növbədə dünya energetikasının qlobal tendensiyaları haqqında söhbət gedib. "Bunu bilmək çox vacibdir, belə ki, ilk növbədə Azərbaycan və Türkmənistan kimi ölkələr daima enerji sahəsində müstəqil dövlətin milli siyasətinə düzəlişlər etməlidirlər", - Əliyev qeyd edib. "Konfransın əsasında iki ölkənin neft-qaz potensialı, bu gün regionda nəyə sahib olduğumuz, bu gün özümüzü necə təmin etməyimiz, bizim enerji təhlükəsizliyimizi necə təmin etməyimiz və prinsip etibarilə regionda edə biləcəklərimiz dayanır", - Azərbaycanın sənaye və energetika naziri bildirib.
Konfransın gedişində Türkmənistan və Azərbaycanın neft-qaz sahəsində əməkdaşlıq imkanları və potensialı haqqında müəyyən təsəvvürlər alınıb. "Hamını, o cümlədən Azərbaycan və Türkmənistanı maraqlandıran başlıca məsələ regionun, Avropanın, qitənin enerji təhlükəsizliyidir", - Əliyev bildirib.
"Bizim müzakirə etdiyimiz vacib məsələlərdən biri də, regional layihələrin inkişafı, yolların və nəqliyyat dəhlizlərinin diversifikasiyası, mümkün genişləndirilməsi və yeni, etibarlı, təhlükəsiz və ən başlıcası iqtisadi səmərəli dəhlizlərin yaradılması məsələsidir", - o vurğulayıb.
"Düşünürəm ki, bizim çox sayda görüşümüz, diskussiyalarımız və olsa bilsin ki, tədqiqatlarımız, səciyyəvi tədqiqatlarımız olacaq. Bunlarsız belə regional layihələrin həlli demək olar ki, mümkün deyil. Ümid edirəm ki, bu görüş sonuncu olmayacaq", - Əliyev bildirib.
Müəlliflə əlaqə saxlamaq üçün elektron ünvan - [email protected]