Azərbaycan, Bakı, 25 may / Trend , müxbir E.İsmayılov /
"SOCAR-ın Bakı-Novorossiysk kəməri ilə neft nəqlinin həcmini Bakı NEZ-lərində xammalın həcminin bir qədər azalması hesabına artırması planlaşdırılır", - SOCAR-ın yüksək vəzifəli nümayəndəsi deyib. Bu il Azərbaycan bu kəmərlə 2,5 milyon ton neft nəql etməyi planlaşdırır. 2008-ci ildə bu rəqəm 1,3 milyon ton olub.
"Bakı-Novorossiysk kəməri ilə neft nəqlinin artırılması NEZ-lərdə xammalın həcminin bir qədər azalması və quruda neft çıxaran neft şirkətlərinin nəqli artırması hesabına həyata keçiriləcək", - mənbə bildirib.
Mənbə bu il Azərbaycanda neft emalının həcmi haqda məlumat verməyib.
SOCAR-ın tərkibinə daxil olan iki NEZ-də yanvar-aprel aylarında 2 milyon ton neft emal edilib. Ötən ilin analoji dövründə bu rəqəm 2,5 milyon ton olub. SOCAR öz vəsaitləri hesabına dəniz və qurudakı yataqlardan əldə etdiyi ildə 7 milyon ton nefti emal edir.
Mənbənin bir müddət əvvəl dediyinə görə, bu kəmərdən istifadə Azərbaycan neftinin nəqli marşrutlarının diversifikasiyası baxımından vacibdir.
Bakı-Novorossiysk boru kəmərinin operatoru qismində 2007-ci ilə qədər Azərbaycan Beynəlxalq Əməliyyat Şirkəti (ABƏŞ) çıxış edirdi. Sonradan qurum bu səlahiyyətləri SOCAR-a verib. Üstəlik, ARDNŞ nümayəndələri qeyd edirlər ki, ABƏŞ üzrə tərəfdaşlar ümumiyyətlə bu marşrutla gələcəkdə neft nəql etmək niyyətində deyildi. Ancaq Gürcüstanda ötən ilin avqustunda baş verən hadisələr üzündən ABƏŞ üzrə tərəfdaşlar (BTC layihəsinin iştirakçıları) bu marşrutla nəqli bərpa etməli oldular.
Bakı-Novorossiysk boru kəməri ilə neft nəqli zamanı SOCAR çıxışda (Novorossiysk limanında) "Urals" markalı neft əldə edir ki, buna da səbəb başqa istehsalçıların nefti ilə qarışmadır. Ancaq Azərbaycan neftinin bu marşrutla nəqlinin həcminin artırılması halında Rusiya tərəfinin Novorossiyskdə keyfiyyət bankının qurulması məsələsini nəzərdən keçirməsi planlaşdırılır.
Məqalə müəllifi ilə əlaqə ünvanı: [email protected]
