Azərbaycan, Bakı, 03 fevral / Trend , müxbir E.İsmayılov/
ARDNŞ ilin sonunadək "8 Mart" dəniz yatağının "8 Mart - 730" platformasında yeni istismar quyusunun qazılması üzrə işləri başa çatdırmağı planlaşdırır. Bu barədə çərşənbə günü ARDNŞ-dəki mənbə deyib.
Quyunun gözlənilən sutkalıq debiti 350 min kubmetr qaz və 40 ton kondensat təşkil edir.
"İş planına əsasən, qazma işləri bu ilin noyabr-dekabr aylarında başa çatmalıdır", - mənbə deyib.
Onun sözlərinə görə, hazırda quyunun dərinliyi 1200 metrdir. Layihə dərinliyi isə 5800 metr təşkil edir.
Əvvəlcə ARDNŞ 578 saylı platformada yeni quyunun qazılmasını planlaşdırmışdı, lakin qazma qurğusunun montajının digər quyuların hasilatına mane olması səbəbindən qurğunu 730 saylı platformaya gətirmək və quyunu bu platformada qazmaq barədə qərar qəbul edildi.
"Hazırda "8 Mart" yatağından sutkada 400 min kubmetr qaz hasil edilir. Geoloqlar gələcək qazma işləri üçün doqquz nöqtə müəyyən ediblər", - ARDNŞ-nin məlumatında deyilir.
Azərbaycanda 59 neft-qaz yatağı var, onlardan 18-i dənizdə, qalanları isə quruda yerləşir.
