Azərbaycan, Bakı, 9 mart / Trend , müxbir E.İsmayılov/
Qazaxıstanın "Tengiz" yatağından hasil edilən neftin "Bakı-Tbilsi-Ceyhan" (BTC) boru kəməri vasitəsilə nəqli yaxın vaxtlarda bərpa ediləcək. Bu barədə çərşənbə axşamı ARDNŞ-dəki (Azərbaycan Respublikası Dövlət Neft Şirkəti) mənbə bildirib.
"Hazırda bu məsələyə dair danışıqlar aparılır. Qazaxıstan neftinin BTC vasitəsilə nəqlinin yaxın zamanlarda bərpa ediləcəyi gözlənilir", - mənbə deyib.
ARDNŞ prezidenti Rövnəq Abdullayevin daha əvvəl dediyi kimi, Qazaxıstanda "Tengiz" yatağı layihəsinin operatoru olan "TengizChevroil" şirkəti öz neftinin nəqlinin bərpası üçün müqavilə bağlanmasına dair "Bakı-Tbilsi-Ceyhan" boru kəmərinin səhmdarları ilə danışıqlar aparır.
2009-cu ildə "Bakı-Tbilisi-Ceyhan" ilə "Tenqiz" yatağından 1,9 milyon ton neft nəql olunub. 2008-ci ildə isə BTC vasitəsilə 258,1 min ton Qazaxıstan nefti nəql olunub.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin tikintisinə 2003-cü ilin aprelində başlanılıb, neftlə doldurulmasına isə 2005-ci ilin 18 may tarixində başlanılıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz); Total (5 faiz); Itochu (3,40 faiz); Inpex (2,50 faiz); ConocoPhillips (2,50 faiz) və Amerada Hess (2,36 faiz).