Azərbaycan, Bakı, 5 iyul /Trend/
Yanvar-iyunda ARDNŞ Azərbaycanın təbii qaz təchizatı sisteminə və idxal əməliyyatlarının təmin edilməsinə, təxminən, 5,8 milyard kubmetr qaz verib. Bu barədə ARDNŞ-in bazar ertəsi yayılan məlumatında deyilir.
Məlumatda qeyd olunduğuna görə, bu həcmdən sənaye, əhali və "Azərenerji" ASC-nin istifadəsinə 456 milyon 032 min kubmetr təbii qaz verilib, Gürcüstana 11 milyon 511 min kubmetr, Rusiyaya 81 milyon 539 min kubmetr qaz ixrac olunub. Yerdə qalan həcm isə Naxçıvan MR-in qaz təminatı üçün ötürülüb.
Yanvar-iyunda Dövlət Neft Şirkəti cari ilin 6 ayında Azərbaycan Respublikasının yanacaq-enerji balansında təbii qazın təhvili üzrə nəzərdə tutulan öhdəlikləri artıqlaması ilə yerinə yetirib. Belə ki, yanvar-iyun ayları ərzində ARDNŞ ölkənin təbii qaz təchizatı sisteminə 630 milyon kubmetrə yaxın "mavi yanacaq" verib. Bundan başqa, ölkə sənayesinin, əhalinin təbii qazla tam təmin olunması və xaricə qazın ixracı ilə əlaqəli bağlanmış müqavilə öhdəliklərini yerinə yetirilməsi məqsədilə yeraltı qaz anbarlarından əlavə olaraq 631 milyon kubmetrə yaxınin "mavi yanacaq" götürülüb.
Bununla yanaşı, yeraltı qaz anbarlarına, əlavə olaraq, 566 milyon kubmetrə yaxın qaz vurulub.
Naxçıvan Muxtar Respublikasının qazla təmin olunması çərçivəsində yanvar-iyunda 179,7 milyon kubmetrə yaxın qaz ötürülüb. İyunda bu göstərici 32,53 milyon kubmetrə yaxın olub.
