Azərbaycan, Bakı, 16 sentyabr /Trend, müxbir E.İsmayılov/
IGI qaz kəmərinin (ITGI qaz kəmərinin Türkiyə, Yunanıstan və İtaliya arasındakı hissəsi) "Nabucco" qaz kəməri ilə birləşdirilməsi Türkiyənin qaz kəməri sistemindən yan ötməklə, Yunanıstan və İtaliyanın qaz bazarlarının qazla təmin olunmasına imkan verəcək. Bu barədə cümə axşamı Bakıda "RWE Supply&Trading" Biznesin İnkişafı Departamentinin rəhbəri Ceremi Ellis bildirib.
Onun sözlərinə görə, "Nabucco" qaz kəməri ilə qazın nəqli tarifləri IGI-də olduğundan, 25 faiz ucuzdur. Çünki bu marşrutla İtaliya və Yunanıstana qaz tədarükü üçün Türkiyənin qaz kəməri sistemindən istifadə etmək vacibdir. Bunun üçün "Botas" boru kəməri sistemi yenidən qurulmalıdır.
Öz növbəsində, Yunanıstanın DEPA şirkətinin nümayəndəsi IGI-nin "Nabucco"nun reallaşdırılmasında ilk mərhələ ilə bağlı ideya irəli sürülməsi barədə təkliflə çıxış edib.
"Nabucco"nun ITGI və TAP kimi layihələr üzərində üstünlüyü sonuncuların yalnız bir ölkənin bazarına yönəlmiş olmasından ibarətdir.
Ellis qeyd edib ki, "Nabucco" bir neçə mənbədən, o cümlədən, Azərbaycan, Türkmənistan və İraqdan qaz tədarükünü təklif edir. "Hazırda hər üç istiqamətdə danışıqlar aparılır və irəliləyiş gözlənilir", - Ellis bildirib.
Dəyəri 7,9 mlrd avro olan "Nabucco" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək.
"Nabucco" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq, Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Yunanıstan, eləcə də Türkiyə ilə İran arasında yerdə qalan hissəsinin tikintisi daxildir.
"Nabucco" qaz kəmərinin uzunluğu 2 730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək, Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.
Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
