Azərbaycan, Bakı, 25 oktyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) lazımi məlumatların əldə edilməsi məqsədilə Xəzərin Azərbaycan sektorundakı "Günəşli" yatağında ikibloklu qaz-lift platformasının tikintisi çərçivəsində sualtı infrastrukturun köçürülməsi üçün dalğıc işləri aparıb. Bu barədə bazar ertəsi ARDNŞ-dəki mənbə deyib.
Onun sözlərinə görə, infrastrukturun köçürülməsi üçün dalğıc işləri görülüb, lakin hazırda hava şəraiti və bunun üçün lazımi avadanlığın olmaması köçürülmə işlərinin aparılmasına imkan vermir.
"Seçilən yerdə artıq hazır olan iki blok quraşdırılacaq. Lakin platformanın quraşdırılacağı yer hələ ki hazır deyil. Bu blokların quraşdırılması üçün infrastruktur və kommunikasiyalar, xüsusilə də işlək neft və qaz kəmərləri köçürülməlidir. Lakin indi hava şəraiti buna imkan vermir, eyni zamanda lazımi avadanlıq da yoxdur", - mənbə qeyd edib.
Hər iki blok artıq yatağa göndərilməyə hazırdır. Bloklardan biri Heydər Əliyev adına Bakı Dərin Özüllər Zavodunda, ikincisi isə 90-cı illərdən istifadəsiz qalmış "Günəşli-20"nin dirək bloku əsasında hazırlanıb.
Yeni platforma "Günəşli" yatağında, dənizin 90-92 metr dərinliyində "Günəşli-4" platformasından 50 metr məsafədə qurulacaq. Platformalar öz aralarında piyada körpüsü ilə birləşəcək. Layihəyə əsasən, sosial infrastruktur - yaşayış bloku, yeməkxana, ehtiyat qazma və vertolyot meydançası hər iki platforma üçün ümumi olacaq.
Yeni platformanın yuxarı hissəsi sənaye məqsədləri üçün istifadə olunacaq. Burada 8 maşından ibarət qaz-lift kompressor stansiyası tikiləcək. Stansiyanın köməyi ilə qaz 125 atmosfer təzyiqi altında sıxılaraq laylara vurulacaq. Yuxarı quruluşlar - kompressor stansiyası və bütün sənaye infrastrukturu xaricdə layihələşdiriləcək və istehsal ediləcək.
Texnoloji platformanın hidrotexniki dayaq hissələri ARDNŞ-nin "Neftqazelmitədqiqatlayihə" İnstitutunda layihələşdirilib.
