...

ARDNŞ Bakı-Tbilisi-Ceyhan boru kəməri ilə neft ixracını artırıb

Energetika Materials 3 Noyabr 2010 16:07 (UTC +04:00)

Azərbaycan, Bakı, 3 noyabr /Trend, müxbir E.İsmayılov/

Yanvar-oktyabr aylarında ARDNŞ-nin Marketinq və İqtisadi Əməliyyatlar İdarəsi Bakı-Tbilisi-Ceyhan (BTC) boru kəməri ilə 23,16 milyon tondan çox neft ixrac edib. Bu göstərici ötən ilin yanvar-oktyabr aylarında 20,5 milyon ton olub. Bu barədə çərşənbə günü İdarənin məlumatında deyilir.

Yanvar-sentyabr aylarında ümumilikdə BTC ilə 28 milyon ton neft nəql edilib. Sentyabrda isə neft boru kəməri ilə üç milyon tondan artıq neft nəql olunub.

BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci il mayın 18-də başlanılıb.

BTC-nin tikintisi dörd milyard dollara başa gəlib. Bu, inşaat işlərinə, boru kəmərinin doldurulmasına çəkilən xərclər və maliyyə xərcləridir. Bank faizlərinin ödənilməsi bura daxil deyil. Maliyyə kreditinin ümumi həcmi 2,6 milyard dollar təşkil edir.

BTC-nin səhmdarları BP (30,1 faiz), AzBTC (25 faiz), "Chevron" ( 8,90 faiz), "Statoil" (8,71 faiz), TPAO (6, 53 faiz), "Eni" (5 faiz), "Total" (5 faiz), "Itochu" (3,40 faiz), "Inpex" (2,50 faiz), "ConocoPhilips" (2,50 faiz) və "Hess" (2,36 faiz) şirkətləridir.

Xəbər lenti

Xəbər lenti