Azərbaycan, Bakı, 26 noyabr /Trend, müxbirlər E.İsmayılov, N.İsmayılova/
Neft-qaz şirkətləri atmosferə səmt qazı həcmlərinin atılması və ətraf mühitə təsirin azaldılması məqsədilə birgə iş aparmalıdırlar. Bu barədə Dünya Bankının (DB) Azərbaycandakı nümayəndəliyinin rəhbəri Cozef Ouen çərşənbə axşamı Bakıda keçirilən "Xəzəryanı neft-qaz şirkətlərinin iqlim dəyişikliklərinə təsirin azazldılması təşəbbüsü: regionlar arasında təcrübə mübadiləsi" adlı konfransın gedişində bildirib.
Onun sözlərinə görə, perspektivdə alternativ enerji mənbələrindən istifadə tədricən artacaq. Lakin indiki məqamda əsas enerjidaşıyıcılar neft-qaz yataqlarının işlənməsi gedişində hasil olunur ki, bu da ətraf mühitə mənfi təsir göstərir.
DB nümayəndəliyinin rəhbəri ARDNŞ-nin (Azərbaycan Respublikası Dövlət Neft Şirkəti) atmosferə səmt qazı həcmlərinin atılması və ətraf mühitə təsirin azaldılması üzrə gördüyü fəal işləri qeyd edib.
Konfransın gedişində Azərbaycandakı iri enerji layihələrinin iştirakçısı olan "BP Azerbaijan" şirkətinin vitse-prezidenti Maykl Barnsın sözlərinə görə, şirkətlərin məqsədi istixana effekti yaradan atmosferə səmt qazının tullantılarının həcminin illik 10 faiz azaldılmasıdır və cari məlumatlara görə, artıq bu istiqamətdə nəticələr var.