Azərbaycan, Bakı, 10 avqust /Trend, müxbir E.İsmayılov/
Yaxın vaxtlarda Azərbaycanın "Şahdəniz" dəniz qaz-kondensat yatağının işlənməsinin ikinci mərhələsinin qabaqlayıcı qazma proqramı çərçivəsində üçüncü dayaz quyunun qazılmasına başlanacaq. Bu barədə Trend-ə neft-qaz bazarındakı mənbə bildirib.
Quyuların qazılması "İstiqlal" üzən qazma qurğusu ilə həyata keçirilir. Hazırda qurğunun qabaqlayıcı blokunun Böyük Britaniyada sertifikasiyada olmasına rəğmən, onunla dayaz quyuların qazılması mümkündür.
"Yataqda artıq dərinlyi 1100-1150 metr olan iki quyu qazılıb və yaxın vaxtlarda üçüncü quyunun qazılmasına başlanacaq", - mənbə qeyd edib.
Onun sözlərinə görə, ümumilikdə 4 nisbətən dayaz quyunun qazılması planlaşdırılır. Həmin quyular sonra tam qazılacaq.
Dayaz quyuların qazılması üzrə işlər yatağın işlənməsinin ikinci mərhələsi çərçivəsində nəzərdə tutulan iş qrafikindən geri qalmamaq məqsədilə aparılır.