Azərbaycan, Bakı, 26 noyabr /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) 2014-cü ildə yeni üzən qazma qurğusunun tikintisini başa çatdıracaq. Trend-in məlumatına görə, bu barədə bazar ertəsi ARDNŞ-nin birinci vitse-prezidenti Xoşbəxt Yusifzadə Xəzər-Avropa İnteqrasiya İşgüzar Klubunun (CEIBC) iclasında bildirib.
"Yeni qazma qurğularının tikintisi yeni yataqların açılması baxımından çox əhəmiyyətlidir. Hazırda Azərbaycanda hər üç qazma qurğusu mövcud yataqların, xüsusən "Şahdəniz" qaz-kondensat yatağının işlənməsi üçün cəlb edilib ki, bu da perspektiv strukturlarda axtarış-kəşfiyyat qazma prosesini və yeni yataqların açılmasını ləngidir", - Yusifzadə qeyd edib.
Onun sözlərinə görə, hazırda "Abşeron" qaz-kondensat yatağında, "Babək", "Şəfəq-Asiman", "Naxçıvan" və digər perspektiv strukturlarda qazma işlərinin aparılması üçün qazma qurğularına ehtiyac hiss olunur.
