Azərbaycan, Bakı, 5 sentyabr /Trend, müxbir A.Axundov/
Azərbaycan gündəlik 400 milyon kubmetr həcmində temperaturu 30-100°С arasında olan termal su ehtiyatlarına (istismar edilən və proqnozlaşdırılan) malikdir. Bu barədə cümə axşamı Trend-ə Sənaye və Energetika Nazirliyindən bildiriblər. Bu mənbələrin istifadə istiqamətləri və texniki-iqtisadi göstəriciləri öyrənilib.
Nazirlikdən deyiblər ki, termal sulardan istifadə baxımından Xəzəryanı-Quba və Talış-Lənkəran zonaları, həmçinin Kür-Araz ovalığı perspektivli hesab edilir. Termal sular Xəzəryanı-Quba və Kür-Araz zonalarında yaşayış məntəqələrinin istilik təchizatında, Talış-Lənkəran regionunda isə balneoloji məqsədlərdən başqa, kənd təsərrüfatında istifadə oluna bilər.
Qurumdan qeyd ediblər ki, bundan savayı, Azərbaycan ərazisi günəş enerjisindən istifadə üçün böyük potensiala malikdir: "Abşeron yarımadası, Kür-Araz ovalığı və Naxçıvanda hər kvadratmetrə düşən günəş enerjisinin intensivliyi 0,8-1,2 kVt-a çatır. Bu potensialdan istifadənin perspektivli istiqamətləri günəş enerjisi kadastrının və rəqəmsal günəş xəritələrinin yaradılması, müşahidə və ölçmə layihəsinin icrası, günəş parkı layihəsinin həyata keçirilməsidir".
Nazirlikdən onu da bildiriblər ki, Azərbaycan ümumilikdə 2020-ci ilədək bərpa olunan enerji mənbələrindən istifadə etməklə 2000 MVt generasiya gücü əldə etmək istəyir.
