Azərbaycan, Bakı, 24 fevral /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) beynəlxalq səviyyəli rəqabət şəraitində fəaliyyəti ixtisaslı profil kadrların olmasını tələb edir. Trend-in məlumatına görə, bunu ARDNŞ-nin kadr, rejim və informasiya texnologiyaları üzrə vitse-prezidenti Xalik Məmmədov mətbuat konfransında deyib.
Onun sözlərinə görə, ARDNŞ bilikləri ən müasir standartlara, o cümlədən neft-qaz mühəndisliyi sahəsindəki standartlara uyğun olacaq ixtisaslı kadrların hazırlanması sahəsində fəal iş aparır.
X.Məmmədov qeyd edib ki, şirkətin neft-qaz sahəsində ən müasir nailiyyətlərlə tanış olan kadrlara ehtiyacı var: "Bütün bunlar zəruridir, çünki şirkət beynəlxalq səviyyədə fəaliyyət göstərir".
Vitse-prezident bildirib ki, ARDNŞ-nin struktur bölmələrində həyata keçirilən islahatlar ARDNŞ-nin strukturunun sadələşdirilməsi və onun beynəlxalq səviyyəli şirkətə çevrilməsi üzrə işlərin bir hissəsidir: "Hazırda ARDNŞ əməkdaşlarının sayı 60 min nəfərdən bir az çoxdur və perspektivdə şirkətin strukturunun optimallaşdırılması üzrə işlər davam etdiriləcək ki, bu da zamanın tələbidir".