Azərbaycan, Bakı, 28 mart /Trend, müxbir E.İsmayılov/
Mövsümün əvvəlindən Azərbaycanın yeraltı qaz anbarlarından 1,95 milyard kubmetrə yaxın qaz götürülüb. Bu barədə Trend-ə ARDNŞ-dəki (Azərbaycan Respublikası Dövlət Neft Şirkəti) mənbə məlumat verib.
Azərbaycanın yeraltı qaz anbarlarından qazın götürülməsi adətən payızdan başlayır ki, bu da ölkə ərazisində hava şəraitinin pisləşməsi və qaza tələbatın artması ilə bağlıdır.
Azərbaycan iki - Qaradağ və Qalmaz yeraltı qaz anbarına malikdir.
Mənbənin sözlərinə görə, qaz anbarından götürülən qazın ümumi həcmindən 1,04 milyard kubmetr Qaradağ, 903,8 milyon kubmetr isə Qalmaz yeraltı qaz anbarının payına düşür.
Hazırda qaz anbarlarında qalan qazın ümumi həcmi 1,5 milyard kubmetrə yaxındır. Bunun 834,41 milyon kubmetri Qaradağ, 664,82 milyon kubmetri isə Qalmaz qaz anbarının payına düşür.
Mənbənin sözlərinə görə, hava şəraitinin yaxşılaşması ilə əlaqədar qaza tələbat, eləcə də anbarlardan götürülən qazın həcmi azalır. O cümlədən yeraltı qaz anbarlarından hər gün fevralın 4-dəki 23,37 milyon kubmetrə qarşı 6,59 milyon kubmetr qaz götürülür: "Qaz istehlakı həcmləri azalır, apreldə anbarlardan qaz götürülməsi başa çatacaq".
Qaz vurulması mövsümünün yekunları üzrə Azərbaycanın yeraltı qaz anbarlarındakı qazın həcmi 3,43 milyard kubmetri ötüb. Ötən mövsüm bu rəqəm 3,3 milyard kubmetriə yaxın olmuşdu.
Ötən qaz götürülməsi mövsümünün yekunlarına görə, ölkənin yeraltı qaz anbarlarında qalan qazın həcmi 1,47 milyard kubmetrdən (Qaradağda 780 milyon kubmetrə yaxın, Qalmazda 697,03 milyon kubmetr) çoxdur.
Ölkənin yeraltı qaz anbarlarında 3,5 milyard kubmetrdən çox qaz saxlamaq mümkündür.