Azərbaycan, Bakı, 14 may /Trend/
"Ağburun-dəniz" sahəsində axtarış quyusunun qazılmasına başlanılıb. Bu barədə Trend ARDNŞ-nin rəsmi saytına istinadən məlumat verir.
Məlum olduğu kimi, Azərbaycan Prezidenti İlham Əliyevin müvafiq sərəncamı ilə təsdiq olunmuş ''Azərbaycan Respublikasının yanacaq-energetika kompleksinin inkişafı (2005-2015-ci illər) üzrə Dövlət Proqramı'' çərçivəsində neft və qaz hasilatının artırılması və bu məqsədlə yeni yataqların açılması kimi aktual məsələlər ARDNŞ qarşısında qoyulmuş prioritet vəzifələrdəndir.
Şirkət bu istiqamətdə məqsədyönlü fəaliyyət göstərir, kəşfiyyat-axtarış işlərini sürətləndirir. "Ağburun-dəniz" sahəsində 1 nömrəli axtarış quyusunda aparılan qazma işləri deyilənlərə daha bir sübutdur. "Xəzər-6" tipli üzən qazma qurğusu vasitəsilə həyata keçirilən qazma işləri "Ağburun-dəniz" strukturunun cənub-qərb qanadının tağa yaxın hissəsində kəsilişin stratiqrafiyasını, litologiyasını və neft-qazlılığını öyrənmək məqsədi daşıyır.
Layihə dərinliyi 1250 metr olan quyu Məhsuldar Qatın Qırməki Altı Lay dəstəsinə qazılır.
Qeyd edək ki, "Ağburun-dəniz" strukturu Abşeron arxipelaqının Şimali Abşeron qalxımlar zonasında "Qərbi Abşeron" neft yatağından 6 km cənubda yerləşir.