Azərbaycan, Bakı, 20 avqust /Trend, müxbir Emil İsmayılov/
2014-cü il avqustun 20-nə olan məlumata görə, Azərbaycanın yeraltı qaz anbarlarına 1,54 milyon kubmetrdən çox qaz vurulub. Bunu Trend-ə Azərbaycan Respublikası Dövlət Neft Şirkətindəki (ARDNŞ) mənbə deyib.
Azərbaycanda 2 yeraltı qaz anbarı (Qalmaz və Qaradağ) var. Hər ikisi ARDNŞ-nin balansındadır.
Agentliyin müsahibi bildirib ki, anbarlara vurulan qazın ümumi həcmindən 856,53 milyon kubmetr Qaradağ, təqribən 686,03 milyon kubmetr isə Qalmaz qaz anbarının payına düşür.
Hazırda ölkənin yeraltı qaz anbarlarında aktiv qazın həcmi 2,92 milyard kubmetri ötür. Bu həcmdən 1,6 milyard kubmetrdən çoxu Qaradağ, təqribən 1,32 milyard kubmetri isə Qalmaz qaz anbarının payına düşür.
Anbarlardan qaz götürülməsi mövsümünün yekunu üzrə yeraltı qaz anbarlarında qalan qazın həcmi 3,43 milyard kubmetri ötüb. Daha əvvəlki mövsümün göstəricisi isə təqribən 3,3 milyard kubmetr olub.
Ölkənin yeraltı qaz anbarlarının imkanları onlarda 3,5 milyard kubmetrdən çox qaz saxlamağa şərait yaradır.