Azərbaycan, Bakı, 21 noyabr /Trend, müxbir Emil İsmayılov/
Azərbaycanda tikilən yeni nəsil üzən qazma qurğusu 2016-cı ilin sonunda istismara veriləcək. Trend-in məlumatına görə, bunu cümə günü jurnalistlərə ARDNŞ prezidenti Rövnəq Abdullayev deyib.
Qurğunun "Abşeron" yatağında (yatağın işlənməsi üzrə operator Fransanın "Total" şirkətidir) istifadə ehtimalı haqqında suala cavab verən R. Abdullayev qeyd edib ki, bu məsələyə də baxılır: "Qurğu harada faydalı və səmərəli olacaqsa, orada da istifadə ediləcək".
Onun sözlərinə görə, hazırda "Azəri-Çıraq-Günəşli" (AÇG) neft-qaz yataqlar blokunun uzunmüddətli işlənməsi proqramı hazırlanır: "Proqram üzərində iş hələ başa çatmayıb. Əgər blokda qazma qurğusuna ehtiyac olarsa, qurğu orada istifadə edilə bilər. Lakin hələ qərar qəbul edilməyib".
ARDNŞ prezidenti əlavə edib ki, AÇG blokunda dərin laylı qazın işlənməsi məsələsi (ayrıca obyekt qismində) üzrə tərəfdaşlarla danışıqlar davam edir.
