Azərikimya Dövlət şirkəti (DŞ) 2006-cı ildə yeni investisiya layihələrinin həyata keçirilməsi üzrə işlər aparır. DŞ-də Trend ə bildirilib ki, hazırda yeni layihələrin gerçəkləşdirilməsi üçün vəziyyət və şərtlər araşdırılır. Dövlət strukturunda qeyd olunub ki, yeni layihələr "Etilen-Polietilen" zavodunun yenidən qurulması, propilen istehsalı, ekoloji təmiz və beynəlxalq standartlara uyğun üsulla xlor və kaustik soda istehsalı, kənd təsərrüfatının inkişafı üçün lazımi gübrə istehsalı və s. daxildir.
Bu il ərzində həmçinin DŞ-nin tərkibinə daxil olan müəssisələrin maliyyə vəziyyətinin yaxşılaşdırılması, xüsusilə işçilərin əmək haqlarının artırılması , onların sosial problemlərinin həlli, istehsal sahələrinin texniki baxımdan yaxşılaşdırılması və digər tədbirlər həyata keçiriləcək. 2005-ci ildə Azərikimya proqnozda nəzərdə tutulmuş 123,9 mln. manata qarşı 125,7 mln. manat məbləğində mal istehsal edib. Bu dövr ərzində Azərikimya-nın tərkibinə daxil olan müəssisələrin işçilərinin sayı 6943 nəfər təşkil edib. Onların orta əmək haqqı bütün ölkə üzrə az göstərici təşkil edərək (təxminən 128 manat) 109,5 manat olub.
