Azərbaycan Dövlət Neft Şirkəti aşağı təzyiqli qazın toplanması proqramı üzrə müstəqil işlədiyi "Günəşli" yatağının dayazsulu hissəsində quraşdırılan "Günəşli-4" platformasında hazırlıq işlərinə başlayıb. Bu barədə Trend ə ARDNŞ-dən məlumat verilib.
Platformada qazın təzyiqini artıracaq qaz-kompressor stansiyasının yerləşdirilməsi üçün yer ayrılır. Hazırda platformada olan suyun laya vurulması üçün istifadə olunan nasoslar sökülüb "Günəşli-9" platformasında quraşdırılacaq.
Hazırda Dünya Bankının ekspertləri "Günəşli" yatağında aşağı təzyiqli qazın toplanması üzrə proqram üzərində çalışırlar. Bu proqram Dünya Bankının ayırdığı $481,250 min qrant hesabına həyata keçirilir. Bu layihənin həyata keçirilməsi üçün vəsait Yaponiya hökuməti tərəfindən ayrılıb.
DB ilə razılaşdırma çərçivəsində qazdan istifadə edilməsi üzrə proqram hazırlanacaq ki, bu da atmosferə tullantıların qarşısını alacaq. Proqram üzrə "Günəşli-4" platformasının boş hissəsində qaz-kompressor stansiyasının tikiləcəyi ehtimal edilir. Bu stansiya aşağı təzyiqli qazın təzyiqini artırmağa və onun sahilə nəql etməyə imkan verəcək. "Günəşli" yatağında qaz-kompressor stansiyasının tikintisi 2010-cu ilə kimi bu yataqdan ildə 4,9 mlrd. kubmetrə qədər qaz hasil etməyə kömək edəcək. Hazırda bu göstərici ildə 2,2 mlrd. kubmetrə bərabərdir.
Bu gün sutka ərzində "Günəşli" yatağından atmosferə 1,6 mln. kubmetr və "Çıraq"dan 800 minə yaxın kubmetr qaz hasil olunacaq.
