...

ABƏŞ Azərbaycanın yüngül neftinin dəmir yolu ilə nəqlini dayandıracaq

Energetika Materials 20 İyul 2006 15:08 (UTC +04:00)

Azərbaycan Beynəlxalq Əməliyyat Şirkəti (ABƏŞ) sentyabr ayından "Azəri-Çıraq-Günəşli" (AÇG) dəniz blokunda hasil edilən Azeri Light növlü neftin dəmir yolu ilə Batumi limanına ixracını dayandırmağı planlaşdırır.

10% payla ABƏŞ-in iştirakçısı olan ARDNŞ-dən Trend ə verilən xəbərə görə, neftin Batumiyə ixrasının dayandırılması Bakı-Tbilisi-Ceyhan (BTC) boru kəmərinin istismara verilməsi ilə bağlıdır.

"AÇG-də neft hasilatının artması və ixrac boru kəmərlərinin çatışmaması ilə əlaqədar, vaxtilə ABƏŞ konsorsiumu neftin dəmir yolu ilə Batumiyə nəqlinə məcbur idi", - deyə ARDNŞ-dən bildiriblər.

Sentyabrın əvvəlinə qədər BTC Co şirkəti Bakı-Ceyhan boru kəmərində bir sıra işləri tamamlamağı planlaşdırır və bu əvvəllər Batumiyə ixrac edilən həcmi nəql etməyə imkan verəcək. Bu il Batumiyə hər ay 430 min tondan bir qədər artıq Azeri Light nefti ixrac olunub.

Beləliklə, sentyabr ayından Azərbaycan neftini Batumi limanına ixrac edən yeganə şirkət Amerikanın ExxonMobil şirkəti olacaq. Bu şirkət AÇG-nin iştirakçısıdır və öz payına uyğun həcmdə xammal alır. ExxonMobil həmçinin AÇG-nin digər iştirakçısı - Devon şirkətinin neftini də ixrac edir. Hər iki şirkət BTC layihəsinin iştirakçısı olmamaq barədə qərar qəbul edib. Bununla əlaqədar ExxonMobil (və Devon) sərbəst şəkildə öz neftini ixrac edir.

ABƏŞ-in yüngül neftinin dəmir yolu ilə Batumi limanına nəqli 2006-cı ilin əvvəlindən aşağıdakı kimi olub:

yanvar - 354 min ton;

fevral - 438 min ton;

mart - 524 min ton;

aprel - 524 min ton;

may - 497 min ton;

iyun - 266 min ton.

Cəmi: 2,603 mln. ton.

Xəbər lenti

Xəbər lenti